Lajme shqip » PESHNGRITJE

Daniell Godeli, medalje ari në stilin e shtytjes në Europian (Burimi: Balkanweb, www.balkanweb.com)

gazeta e pavarur — Wed, 10 Apr 2013 17:39:00 +0000

TIRANE-I papërmbajtshëm peshëngritësi ynë Daniell Godeli, pasi në stilin e shtytjes ka arritur të ngre 180 kg, 4 kg më shumë se vendi i dytë, që do të thotë medalje ari në këtë stil. Në stilin e shkëputjes ai ngriti 145 kg, duke zënë vendin e tretë, pra medalje bronxi. Në dy garësh, Daniell Godeli ka ngritur 325 kg, duke u renditur i treti, duke marrë medalje bronxi. Pra, 3 medalje për Shqipërinë në Kampionatin Europian të Peshëngritjes, që zhvillohet në Tiranë. 1 medalje ari dhe dy bronzi, të tre të fituara nga peshëngritës Daniell Godeli, i cili garoi në peshën 69 kg.

Ndërkohë, peshëngritësi tjetër Brikel Calja, pas dështimit në stilin e shkëputjes, ku nuk arriti të ngrejë në asnjë nga tre provat, në stilin e shtytjes ka ngritur 174 kg, duke zënë vendin e katërt. Ka tentuar në provën e fundit të ngrejë 177 kg, por nuk ka arritur dot. Në orën 20:00, do të garojë Romela Begaj, nga e cila pritet medalje.

10.04.2013

Burimi: Balkanweb

The post Daniell Godeli, medalje ari në stilin e shtytjes në Europian (Burimi: Balkanweb, www.balkanweb.com) appeared first on Lajme shqip.

Federata Botërore e Peshëngritjes “fal” Shqipërinë (Burimi: Gazeta Shqip, gazeta-shqip.com)

lajme nga bota — Sun, 16 Sep 2012 07:41:39 +0000

Federata Botërore e Peshëngritjes ka vendosur të fal Shqipërinë. Bordi Ekzekutiv i kësaj federate pas mbledhjes së të shtunës në Sllovaki ka vendosur unanimisht të heq pezullimin e Federatës Shqiptare të Peshëngritjes për një afat të pacaktuar nga çdo aktivitet ndërkombëtar.

Por FSHP-së do ti duhet të paguajë një gjobë prej 50 mijë dollarësh. Vendimi për pezullimin e federatës sonë të peshëngritjes deri në një afat të pacaktuar, erdhi pas zbulimit të 3 rasteve pozitive në testin anti-doping të sportistëve tanë. Ilir Suli, Erkand Qerimaj dhe 20-vjeçari Hysen Pulaku rezultuan pozitiv në testin e dopingut. Ky i fundit pak ditë më parë u dënua me 4 vjet pezullim nga garat ndërkombëtare.

Ndërkohë Bordi Ekzekutiv i Federatës Ndërkombëtare të Peshëngritjes ka konfirmuar se europiani i peshëngritjes për të rritur në vitin 2014 do të zhvillohet në Shqipëri. Kjo do të jetë hera e parë që Shqipëria do të jetë organizatore e një evenimenti kaq të rëndësishëm europian.

15 shtator 2012

Burimi: Gazeta Shqip

The post Federata Botërore e Peshëngritjes “fal” Shqipërinë (Burimi: Gazeta Shqip, gazeta-shqip.com) appeared first on Lajme shqip.

Begaj kërcënon me ikje nga Shqipëria (Burimi: Gazeta Panorama, www.panorama.com.al)

lajme nga bota — Fri, 14 Sep 2012 12:13:55 +0000

Vendimi i Federatës Botërore të Peshëngritjes nuk është pritur mirë nga nënkampionia e Europës, Romela Begaj. Sportistja kërkon barazi, pasi sipas saj ky sport është individual dhe, si rrjedhojë e kësaj, penalizimet duhen të jenë individuale, pasi për gabimin e dikujt nuk mund të ketë penalizim në masë për gjithë sportistët e tjerë. “Kjo është një gjë shumë e rëndë, jo vetëm për mua, por edhe për të gjithë shqiptarët, pasi prishet imazhi i sportit kryesor në vend. Unë si Romela dhe sportistët e tjerë mbahemi me këtë sport, ushqejmë familjet me të dhe nuk kemi asnjë profesion tjetër. Për mua ky është profesioni i vetëm dhe nuk është faji im për gjendjen ku ndodhemi. I bëj thirrje shtetit, Kryeministrit dhe zotit Basha si sportiste e Tiranës, që të mos më hedhin në rrugë, sepse unë me këtë mbahem. Nëse kjo nuk do të ndodhë, me keqardhjen më të madhe e them se do të konkurroj për një flamur tjetër”, ka thënë ajo.

14.09.2012

Burimi: Gazeta Panorama

The post Begaj kërcënon me ikje nga Shqipëria (Burimi: Gazeta Panorama, www.panorama.com.al) appeared first on Lajme shqip.

Dopingu, përjashtohet për 4 vjet peshëngritësi Pulaku (Burimi: Gazeta Tema, www.gazetatema.net)

lajme nga bota — Fri, 14 Sep 2012 08:04:33 +0000

Federata Botërore e Peshëngritjes ka përjashtuar për 4 vjet nga aktivitetet ndërkombëtare peshëngritësin shqiptar Hysen Pulaku.

Vendimi i Federatës Botërore të Peshëngritjes është marrë pasi peshëngritësi Pulaku rezultoi pozitiv në testin antidoping gjatë Lojrave Olimpike Londër 2012.

Gjithashtu në vendim kërkohet nga Federata e Peshëngritjes të paguajë edhe një gjobë prej 5 mijë dollarësh.

13.09.2012

Burimi: Gazeta Tema

The post Dopingu, përjashtohet për 4 vjet peshëngritësi Pulaku (Burimi: Gazeta Tema, www.gazetatema.net) appeared first on Lajme shqip.

Shqipëria olimpike harron rrugën e kthimit (Burimi: Gazeta Shqip, gazeta-shqip.com)

gazeta e pavarur — Sat, 11 Aug 2012 06:55:49 +0000

Sportistët kuqezinj do të qëndrojnë në Londër deri dy ditë pas mbylljes së Olimpiadës

Sporti ka qenë disa herë protagonist, ndërsa disa herë sportistët dhe të tjera herë polemikat e dështimeve. Shqipëria olimpike bën pjesë vetëm tek kjo e fundit, pasi në Londër 2012 nuk mundi të lërë asnjë shenjë, përjashto disa rekordeve personale të ndonjë sportisti, por që janë shumë pak po t’i krahasosh me objektivat për medalje. Shqipëria, gjatë këtyre ditëve, zien nga polemikat, përplasjet mes palëve, të cilat e kanë kthyer fajin e dështimit në një top futbolli, që shkon sa këtej andej. E ndërsa pritet të bëhet një analizë e thellë dhe objektive për rezultatet zhgënjyese në Olimpiadë, edhe pse ekipi olimpik që përfaqësoi vendin në Londër 2012 e ka përfunduar prej ditësh misionin e tij në këto lojëra olimpike, ende nuk e ka marrë rrugën e kthimit për në Shqipëri. Gara e fundit e kuqezinjve ishte ajo e qitësit Arben Kuçana në 50 metra pistoletë. Por pas mbylljes së garave të kuqezinjve, nëntë sportistët shqiptarë dhe delegacioni që i shoqëron ata vazhdon të shijojë fshatin olimpik, ku është akomoduar që 7 ditë para hapjes së Lojërave Olimpike 2012, por edhe bukuritë e kryeqytetit britanik. Në Komitetin Olimpik Kombëtar Shqiptar (KOKSH) është mësuar se ekipi olimpik shqiptar do të zbarkojë në Tiranë vetëm më datën 14 gusht, vetëm dy ditë pas mbylljes së garave të Lojërave Olimpike, pasi një gjë e tillë është e parashikuar në axhendën olimpike. Kthimi i tyre do të bëhet në dy grupe të ndara, që do të udhëtojnë drejt vendlindjes. Xhudistja Majlinda Kelmendi e ka braktisur ekipin olimpik vetëm pak ditë pas konkurrimit dhe para një jave mbërriti në shtëpi (Kosovë). Menjëherë pas kthimit, pritet të mbahet analiza e shumëpërfolur për gjithçka që nuk shkoi mirë në Londër 2012 në këtë ekip, i cili duket se i mungoi shpirti olimpik. Një nga pikat më nevralgjike është ajo e dopingut të Hysen Pulakut, që ka prodhuar një sherr mes Federatës Shqiptare të Peshëngritjes (FSHP) dhe KOKSH-it. Kjo gjë ka krijuar një atmosferë negative për sportin, që herë pas here shfaqet kur ndodhin episode të tilla, edhe pse shqiptari nuk ishte i vetëm me doping në Olimpiadë. Ndërsa për sa u përket rezultateve, tabuja “medalje” për Shqipërinë do të vazhdojë deri në Lojërat Olimpike Rio 2016. Sportistët tani i provuan lotët e dështimit, por jo ato të fitores që të çon në Olimpin sportiv, që i dhuron një emocion unik një kombi të tërë, i cili i ka sytë te sportistët e tij. Por tashmë do të duhet të presim 14 gushtin për të bërë bilancin përfundimtar.

Analiza

Më 14 gusht, dy ditë pas përfundimit të Lojërave Olimpike Londër 2012, ekipi olimpik do të zbarkojë në Shqipëri. Më pas pritet një analizë e thellë e paraqitjes së kuqezinjve.

10.08.2012

Burimi: Gazeta Shqip

The post Shqipëria olimpike harron rrugën e kthimit (Burimi: Gazeta Shqip, gazeta-shqip.com) appeared first on Lajme shqip.

Peshëngritje, shtanga e godet në qafë (Burimi: Top Channel, www.top-channel.tv)

lajme nga bota — Wed, 08 Aug 2012 14:45:34 +0000

Kampioni olimpik në fuqi në peshëngritje për peshën e rëndë 105 kg, gjermani Matias Shtainer, është goditur nga shtanga në momentin e ngritjes së 196 kilogramëve, në provën e tij të tretë.

Humbja e ekuilibrit për fat është shoqëruar nga një reagim i shpejtë i shtangistit gjerman, por gjithsesi dëmtimi ka qenë i rëndë.

Ai ka qëndruar për disa minuta mbi pedanë, ku është ndihmuar të ngrihet edhe nga mjekët, të cilët nxituan për t’i ardhur në ndihmë. Më pas ai është ngritur duke përshëndetur të gjithë të pranishmit në pallatin e sportit.

08.08.2012

Burimi: Top Channel

The post Peshëngritje, shtanga e godet në qafë (Burimi: Top Channel, www.top-channel.tv) appeared first on Lajme shqip.

Mjekësia dhe sukseset e olimpiadave (Burimi: Gazeta Shqip, gazeta-shqip.com )

gazeta e pavarur — Mon, 06 Aug 2012 09:49:22 +0000

Në korrik të vitit 1912, gazeta mjekësore dhe kirurgjikale e Bostonit festoi “Supremacinë Amerikane”, duke vënë në dukje se suksesi i madh i atletëve amerikanë në Lojërat Olimpike të Stokholmit është sa interesant fiziologjikisht, po aq edhe si kënaqësi kombëtare. Megjithëse Suedia fitoi më tepër medalje në përgjithësi, atletët nga Shtetet e Bashkuara fituan më tepër medalje ari me një diferencë të ngushtë 25-24. Cili ishte shkaku i dominancës së tyre? Popullata e gjerë e Shteteve të Bashkuara “është një përzierje e të gjitha racave dhe në këtë mënyrë ka më shumë mundësi të përzgjedhë shtamet më të mira dhe t’i ushqejë ato”. Atletët amerikanë “ishin më mirë të ushqyer dhe të stërvitur” se kundërshtarët, “e cila të çon sërish në superioritetin fizik”. Për më tepër, “dispozicioni intensiv kombëtar i nxit atletët të trajnohen me më shumë padurim dhe në vazhdimësi, si dhe me qëllimin profesional për të fituar.” Megjithëse nëntonet eugjenike janë venitur, mjekët kanë ruajtur interesin e tyre në Lojërat Olimpike. Qendra e vëmendjes në kompeticionin 4 vjetor ndriçon ndryshime dramatike në mjekësi dhe në sport.

Njohuritë për lojërat e lashta kanë qarkulluar në literaturën mjekësore, madje para se Pierre de Coubertin t’i ringjallte Lojërat Olimpike në 1896. Një ese në gazetën mjekësore dhe kirurgjikale të Bostonit, rreth fuqisë së mendjes mbi trupin, përshkroi “grekun e vjetër i cili vdiq në vend nga gëzimi i tepruar, teksa shihte tre djemtë e tij të kurorëzoheshin me dafina në Lojërat Olimpike”(1851). Autorë të tjerë nxorën mësime nga trashëgimia e Lojërave Olimpike. Disa paralajmëronin se trajnimi i tepruar atletik devijonte energjitë nga zhvillimi mendor, duke i lënë adoleshentët “apatikë dhe të vonuar”. “Ishte vënë re në mënyrë të veçantë nga grekët se asnjë, që në djalëri fitoi çmim në Lojërat Olimpike, nuk u dallua kurrë më vonë.” (1867) Në kontrast, një rishikim i vitit 1891, shpresonin se edukatorët mund të mësonin nga teknikat e lashta dhe të përmirësonin trajnimin atletik në shkollat amerikane.

Kur filluan Lojërat moderne në Athinë, më 1896, mjekët ishin pak të interesuar. Interesimi më i madh i tyre ishte në maratonë. Nxehtësia dhe lagështia i munduan maratonistët në St. Louis në vitin 1904: ku nga 27, 14 e mbaruan garën. Fituesi, i cili u mbështet gjatë garës me sulfat striknine (krijon konvulsione muskulore, që mund të çojnë deri në vdekje), pesë vezë dhe konjak, si rrjedhojë iu nevojit ndihma e katër mjekëve. Nxehtësia shkaktoi gjithashtu probleme në Londër dhe në Stokholm. Kur lojërat rifilluan në vitin 1920 në Antwerp, atletët iu nënshtruan ekzaminimeve fizike. Shtetet e Bashkuara dërguan ekipin e parë të mjekëve në Olimpiadën e Parisit në vitin 1924. Mbikëqyrja e kujdesshme mjekësore vazhdon që atëherë.

Mjekët janë interesuar për Lojërat Olimpike për disa arsye. Në vitet 1920, ata hetuan limitet e fiziologjisë njerëzore. Një grup studioi rremtarët e Yale-s, të cilët fituan medalje ari në Paris. Një mekanizëm i zgjuar zbuloi se në shpejtësinë e tyre garuese – 19.3 kmh – tetë burrat prodhonin katër kuaj fuqi, një rritje 20-fish e metabolizmit në qetësi (1925). Një studim i vitit 1937, i publikuar në gazetë, tregoi se atletët e Olimpiadës së Berlinit, të vitit 1936, konsumonin 7300 kalori në ditë.

Disa herë vetë vendi organizues u bë problem. Shtetet e Bashkuara kërcënuan se do të bojkotonin Olimpiadën e Berlinit, derisa Hitleri u zbut dhe lejoi atletët e zinj dhe hebre të konkurronin. Politika e bojkotit doli përsëri në sipërfaqe në Olimpiadën e Moskës, të vitit 1980, kohë kur marrëdhëniet midis SHBA-së dhe Rusisë ishin të tendosura, si pasojë e pushtimit Sovjetik të Afganistanit. Vende të tjera organizatore krijuan shqetësime mjekësore. Roger Bannister, i cili ishte personi i parë që vrapoi një milje, më pak se 4 minuta, “disaprovoi plotësisht” mbajtjen e lojërave të vitit 1968 në lartësi të madhe në Mexico City. Dhe vërtet, disa qindra atletë pësuan kolaps në atë Olimpiadë, nga migrena, shoku, sinkopi, ose nga eksitimi emocional. Frika nga patogjenet lokale u shfaq para Olimpiadës në Seul (encefaliti Japonez) dhe Barcelona (streptokok rezistent ndaj shumë ilaçeve). Çdo paralajmërim u pasua me përgënjeshtrime të fuqishme. Ngjarjet Olimpike tërheqin sot miliona vizitorë dhe kërkojnë planifikim të kujdesshëm mjekësor. Frika nga terrorizmi u shfaq gjithashtu, sidomos pas atentatit me bombë në Atlanta, ku mbetën dy të vdekur dhe 111 të dëmtuar.

Siguria në sportin Olimpik ka mbetur një shqetësim i përhershëm. Akademia Franceze e Mjekësisë caktoi një komitet para Lojërave të Parisit në 1924, “për të studiuar efektet e atletikës moderne në sistemin njerëzor”. Testet rezultuese “zbuluan një numër alarmant rastesh të zemrës së atletit.” Studime pasuese, nga vitet 1920 (në atletë nga Olimpiada e Amsterdamit 1928) deri në vitet 1990 kanë prodhuar dëshmi kontradiktore, në lidhje me çështjen se trajnimi intensiv fizik mund të shkaktojë zmadhimin e zemrës. Disa sporte janë shqyrtuar në mënyrë të veçantë. Në prag të Olimpiadës së Atlanta-s, një shqyrtim i ashpër krahasoi gjimnastikën për femra me abuzimin e fëmijëve, duke argumentuar se, megjithëse “gjimnastika elitë mund të sigurojë një eksperiencë të thellë kuptimplotë për atletet,” ajo mund të rezultojë gjithashtu “në çrregullime serioze, jetë fizike dhe psikologjike kërcënuese.” Duke cituar dëmtime, çrregullime të të ngrënit dhe probleme sociale, autorët paralajmërojnë se “të rinjtë e talentuar, në çdo nivel konkurrues, duhen mbështetur në vend që të dëmtohen nga sporti i tyre, teksa hyjnë në moshë madhore.”

Një lloj tjetër kontrolli mjekësor doli në vitet 1950. Duke komentuar për një simpozium rreth “fiziologjisë Feidipiane (maratonomaku që përshkroi 40 km në Greqinë e vjetër)”, një artikull i vitit 1957 vuri në dukje përmirësimet dramatike në performancë. Çfarë e shpjegonte “këtë epidemi të thyerjeve të rekordeve”? Artikulli konsideroi kontribute të mundshme nga trajnimi, dieta, antibiotikët dhe motivimi, por u fokusua në “shpjegimin spekullativ”: “se amfetamina po përdorej nga disa atletë për t’i ndihmuar ata të thyenin ndryshe rekorde të pakundërshtueshme.” Praktika të tilla, nëse ndodhnin me të vërtetë, janë të rrezikshme dhe “etikisht të padëshirueshme.” Çdo dekadë, që kalon, sjell skandale të reja rreth drogave që rrisin performancën. Pasi Komiteti Olimpik i SHBA-së pranoi se shtatë çiklistë (përfshirë katër medalistë), kishin marrë transfuzione gjaku në Lojërat e Los Angeles-it, një artikull bombastik e dënoi këtë praktikë jo vetëm sepse ishte e rrezikshme, në mënyrë të veçantë në dritën e epidemisë së SIDA-s, por edhe se “përfaqëson një tentativë terapie mjekësore për t’i garantuar atletëve një avantazh konkurrues të padrejtë. “Kur Ben Johnson-it iu hoq medalja e arit në Olimpiadën e Seulit, në gazeta u shqyrtuan rreziqet mjekësore dhe pasojat ligjore të përdorimit të steroideve (1989). Më pas doli eritropoetina. Një fiziolog holandez shkroi në gazetë se “Lojërat e ardhshme Olimpike ishin quajtur tashmë “Olimpiada Hematokritit”” dhe detyrimi i mjekut u bë i qartë: “Profesioni mjekësor ka përgjegjësinë të shqyrtojë me kujdes këto pasoja të pafavorshme të zhvillimit shkencor”.

Drogat që përmirësojnë performancën i kanë hedhur një hije të gjatë lojërave Olimpike moderne. Nëse agjentët janë striknina, heroina, kokaina dhe morfina, që atletët e përdorën në Olimpiadën e Athinës në vitin 1896 ose amfetaminat, steroidet dhe eritropoetina, që e përdorin disa sot, dilema mbetet e njëjtë. Një specialist i mjekësisë sportive vuri në dukje, në vitin 2004, se “tërheqja nga drogat që përmirësojnë performancën është thjesht që ata të lejojnë përmbushjen e premtimit mitik të performancës atletike pa kufi, termi hubristik (krenari ekstreme dhe arrogancë) i Lojërave Olimpike ‘më shpejt, më lart, më fortë’. Sistemet pasuese të mbikëqyrjes mjekësore kanë çuar në mënyrë të pashmangshme në “një lloj të ri konkurrence”, ku disa atletë përpiqen të jenë një hap para autoriteteve.

Gara e armëve do të vazhdojë për sa kohë shkenca mjekësore prodhon mjete gjithnjë e më të reja për përmirësimin e performancës. A do të provojnë atletët në të ardhmen faktorët e rritjes ose terapinë gjenetike? Një gjë është e sigurt: Olimpiada do të mbetet një objekt i magjepsjes mjekësore.

06.08.2012

Burimi: Gazeta Shqip

The post Mjekësia dhe sukseset e olimpiadave (Burimi: Gazeta Shqip, gazeta-shqip.com ) appeared first on Lajme shqip.

“Pulaku me ilaç kuajsh, Federata dinte gjithçka” (Burimi: Balkanweb,www.balkanweb.com )

lajme nga bota — Wed, 01 Aug 2012 11:03:04 +0000

LONDER- Akuzë e fortë e shefit të misionit olimpik Viron Bezhani ndaj Federatës Shqiptare të Peshëngritjes, por edhe ndaj Komisionit Anti-Doping e Ministrisë së Sporteve. Që nga Londra, ku ndodhet për Olimpiadën e 30-të, ai ka deklaruar për Top Channel se të gjithë e dinin që Hysen Pulaku ishte i dopuar, por ai sërish u lejua të garonte. “Na vjen turp nga ky rast, – thotë Bezhani. – Medikamenti i gjetur nga Agjencia Anti-Doping, përdorej për kuajt në vitin 1069. Pulakun e kanë shoqëruar deri jashtë si person të padëshiruar dhe të gjithë na shohin shtrembër me të drejtë sepse është një rast shumë i rëndë”, shtoi më tej ai. Por, Bezhani nuk lë pa përmendur as Federatën, Ministrinë e Sporteve dhe Komisionin Anti-Doping për këtë rast. “Të gjithë e dinin që ky sportist nuk ishte i pastër. Unë si shef delegacioni këmbëngula që të bëhej kontrolli menjëherë, por përgjigjet dihen që vijnë pas një muaji dhe atëherë nuk kanë vlerë. Ministria ka shumë faj në këtë rast sepse Ministria e ka ngritur Antidopingun për të shmangur raste të tilla dhe kontrollet duhen bërë me kohë që ne të mos turpërohemi këtu. Dopingu është ulur këmbëkryq në Shqipëri”, përfundon Bezhani.
RASTI I KATËRT
Pas rastit të Shqiponja Brahjes një vit më parë, të Ilir Sulit e Erkand Qerimajt këtë vit, kjo është hera e katërt në harkun e një kohe të shkurtër që peshëngritësit shqiptarë kapen me doping. OK, bëhet fjalë për një sport të rëndë, megjithatë duket se masat nuk janë marrë, pavarësisht se paralajmërimet kanë qenë të shumta. Rasti i Erkand Qerimajt ishte ai që tronditi sportin kuqezi, duke qenë se peshëngritësi shkodran sapo ishte shpallur kampion Evrope. Por, gjetja pozitive e Pulakut në Olimpiadë, bëri që Shqipëria të kishte sportistin e parë të përjashtuar nga “Londër 2012″, një rast i rrallë ky, pasi ekipi kuqezi mbeti me 10 sportistë ende pa nisur aktivitetet.
FEDERATA
Drejtuesit e Federatës së Peshëngritjes do të flasin vetëm sot për rastin “Pulaku”, i cili ishte sportisti i parë i përjashtuar nga Lojërat Olimpike të Londrës. Shtangisti nga Peqini doli pozitiv me një substancë të llojit “steroid anabolik”, të quajtur “stanozolol”, e cila u gjet me një analizë të thjeshtë në urinën e tij. Ngjarja shokoi edhe drejtuesit e Komitetit Olimpik Ndërkombëtar, ndërsa tashmë pritet që Federata Botërore e Peshëngritjes ta pezullojë për dy vjet. “Është diçka e mërzitshme, kur kapet një atlet që kërkon të mashtrojë. Uroj të mos ketë të tjerë”, tha zëdhënësi për shtyp i Komitetit Olimpik Ndërkombëtar Mark Adams në një konferencë për mediat.

01.08.2012

Burimi: Balkanweb

The post “Pulaku me ilaç kuajsh, Federata dinte gjithçka” (Burimi: Balkanweb,www.balkanweb.com ) appeared first on Lajme shqip.

Olimpiada, zhgënjen edhe Begaj(Burimi:Gazeta Panorama www.panorama.com.al)

lajme nga bota — Tue, 31 Jul 2012 13:51:08 +0000

Shuhet një tjetër shpresë e Kombëtares olimpike kuqezi për t’u ngjitur në podiumin londinez, ndoshta më e kuotuara nga e gjithë 10-shja shqiptare. Në një formë shumë larg pritshmërive, Romela Begaj dështoi në konkurrimin e saj në peshën 58 kg. Nëse katër vite më parë në Pekin, 25-vjeçarja Begaj (në këtë Olimpiadë të 30-të verore ishte edhe flamurmbajtëse e Shqipërisë olimpike) do të zinte vendin e gjashtë, në “Londër 2012? shkon pikiatë: e 11-ta. Njëherësh mbetet edhe jashtë zonës së medaljeve. Nga gjashtë provat e mundshme, Begaj mundi të realizojë me sukses vetëm 2, nga një për çdo stil. Begaj e ka filluar me këmbë të mbarë stilin e shkëputjes, duke ngritur 101 kg në provën e parë. Por vetëm kaq, pasi më tej u pa në pedanë një tjetër Begaj. Dështon në dy provat e radhës, ndërsa tentoi të ngrinte nga 105 kg. Në përfundim të stilit të shkëputjes, Romela Begaj u klasifikua e teta mes 10 peshëngritëseve konkurrente në këtë peshë. E para në këtë stil u rendit kinezja Li Xueying e Kinës, e cila ka thyer rekordin olimpik, duke ngritur 108 kg, një më shume se rekordi i mëparshëm që mbahej nga bashkëkombësja Yanqing Chen, i vendosur në Lojërat Olimpike të Athinës më 16 gusht të 2008-s. E rënë thuajse totalisht moralisht nga bilanci negativ i stilit të shkëputjes, edhe ai i shtytjes nuk ka asnjë ndryshim. Në provën e parë Begaj ka ngritur 115 kg, por dështoi në dy provat e tjera me 121 kg. Dëshpërim total, madje edhe lot. Përfundimisht Begaj e mbyll Olimpiadën e Londrës e 11-ta me 216 kg të ngritura në dygarësh, teksa në pedanë u ngjitën 17 kundërshtare.

Data:31/07/2012

Burimi:Gazeta Panorama

The post Olimpiada, zhgënjen edhe Begaj(Burimi:Gazeta Panorama www.panorama.com.al) appeared first on Lajme shqip.

Dështon edhe Romela Begaj (Burimi: Gazeta Tema, www.gazetatema.net )

gazeta e pavarur — Tue, 31 Jul 2012 07:43:12 +0000

Edhe një tjetër shqiptare qe pretendonte për medalje në Lojërat Olimpike, Romela Begaj, dështoi, duke u paraqitur larg formës së saj më të mirë.

Në provën e parë në stilin e shkëputjes Begaj ngriti lehtësisht 101 kg, duke treguar se do të jetë një pretendente e fortë. Por këtu ndryshoi gjithçka, Romela dështoi në provën e dytë me 105 kg madje edhe në të tretën me po të njëjtën peshë.

Në stilin e shtytjes Romela ngriti në provën e parë 115 kg, por njësoj se në stilin e parë 25 vjecarja shqiptare dështoi në dy provat e tjera të stilit të shtytjes me 121 kg.

Të martën do të garojnë 3 sportistë të tjerë shqiptarë, dy peshëngritësit Daniel Godelli dhe Briken Calja në peshën 69 kg dhe notari Sidni Hoxha në 100 metra.

30.07.2012

Burimi: Gazeta Tema

The post Dështon edhe Romela Begaj (Burimi: Gazeta Tema, www.gazetatema.net ) appeared first on Lajme shqip.