Lajm-shqip

Rama me banorët e Kombinatit: Basha, kryetar bashkie vetëm në kutinë e televizorit (Burimi: Gazeta Shqip, www.gazeta-shqip.com )

lajmi sot — Tue, 21 May 2013 19:00:53 +0000

Kreu i Partisë Socialiste, Edi Rama, pasditen e sotme ka zhvilluar një bashkëbisedim me banorët e njësisë numër 6 në zonën e Kombinatit në Tiranë.

Rama shprehu besimin se koalicioni “ Aleanca për Shqipërinë Europiane” do të fitojë me një rezultat të thellë në zgjedhjet e qershorit, ndërsa akuzoi qeverinë se ka rritur taksat e biznesit të vogël, ndërsa premtoi heqjen e taksës për këtë biznes brenda 100 ditëve të para të qeverisjes.

“Saliu në 2005 premtoi përgjysmimin e taksës për biznesin e vogël i përgjysmoi vitin e parë, dhe vitin e dytë i doli bishti pas dardhës dhe iu vuri taksën e sheshtë, 1 vit më vonë ju vuri TVSH. Faktikisht me Saliun u nisët me përgjysmim dhe e hëngrët 3-fish. Kështu ndodh me të gjitha premtimet e tij. Me Saliun duhet pasur kujdes kur premton diçka se aty ku premton do e hash me keq sa je. Kështu ndodhi me biznesin e vogël, kështu ndodhi me fermerët që i tha do jua bëj naftën 400 lekë dhe sot është 800 lekë. Ne do e heqim taksën e biznesit të vogël në 100 ditët e para të qeverisjes. Ne do përgjysmojmë tatimin e fitimit që ju sot e keni 10%. Do marrë fund taksimi i dyfishtë dhe do marrim vetëm gjysmën e saj”, u shpreh Rama.

Kryetari i PS nuk la pa sulmuar edhe punën e pasardhësit të tij në Bashkinë e Tiranës, Luzlim Basha duke e vlerësuar një Kryebashkiak vetëm në kutinë e televizorit dhe asgjë më shumë.

“Problemi më i madh që ne kemi me qytetet tona është infrastruktura arsimore dhe sociale. Kur drejtonim Bashkinë e Tiranës kemi bërë shumë në këtë drejtim, por qeveria ka refuzuar t’i japë troje Bashkisë për të ndërtuar çerdhe dhe shkolla, ka privatizuar asetet publike për klientët, miqtë e me radhë. Do e ndryshojmë këtë qasje, jemi të vendosur t’u japim lagjeve mbështetjen për të funksionuar si qendra komunitare. Në 8 maj ndryshoi drejtimi i Bashkisë, por deri sot kemi një kryetar Bashkie vetëm në kutinë e televizorit dhe asgjë më shumë. Janë hapur rrugë dytësore me kohë dhe akoma s’po mbarojnë. Këto janë pasoja e një drejtimi që buron nga vjedhja e votës”, theksoi Rama.

21.05.2013

Burimi: Gazeta Shqip

The post Rama me banorët e Kombinatit: Basha, kryetar bashkie vetëm në kutinë e televizorit (Burimi: Gazeta Shqip, www.gazeta-shqip.com ) appeared first on Lajm-shqip.

Ernest Koliqi Ministria e Kulturës: Kolaboracionisti më i mirë (Burimi: Balkanweb, www.balkanweb.com)

lajmi sot — Tue, 21 May 2013 18:33:14 +0000

Posi…. U ba Shqipnija. Dalin të marrët e vikasin rrnoftë Shqipëria! Ti i mençëm përgjigje tue bërtit në kupë të qiellës: rrnoftë, po, e shpejt me porositë flamuj. Na shkyeju rrnoftë, e ti shit, ban pare tue tregue mbi ndiesit tona. Lojë e bukur, por s’të ka dalë… (“Tregtar Flamujsh”, 1935). Kur Ernest Koliqi i shkroi këto radhë, Shqipëria qe ende mbretëri, e autori ende “patriot”. Duhej të kalonin ende edhe ndoca vite, që ai të bëhej ministër Arsimi nën okupimin italian, e më tej edhe ndoca vite të tjera që me ardhjen e komunistëve ai të quhej më në fund edhe kolaboracionist, e gjatë këtyre viteve, emri e letërsia e tij, të shuhej, të fshihej për të pritur që pas ’90-ta ta shpallte sërish patriot. Djali i Shanit dhe i Age Simonit lindi në Shkodër më 20 maj të 110 viteve më parë. Ministria e Kulturës e përkujtoi dje datëlindjen e tij, duke e konsideruar atë, shkrimtar, vizionar dhe mendimtar të shquar shqiptar. Në kuadër të datëlindjes, ministria u fokusua në purifikimin e figurës së Koliqit, saqë ai u cilësua edhe si kolaboracionisti më i mirë. Në këtë vazhdë, u fol gjatë për meritat e padiskutueshme të përhapjes së arsimit shqip në Kosovë. “Ai dërgoi mbi 200 arsimtarë shqiptarë, normalistë, nga më të mirët në Kosovë, hapi atje shkollat shqipe dhe të parën shkollë të mesme. Me punën dhe përkushtimin e tij, Koliqi vendosi bazat e arsimit shqip në Kosovë, që do të sillte ato ndryshime rrënjësore në zhvillimin e kulturës dhe formimin e elitave arsimore e kulturore në Kosovë në vitet që do të vinin”, – do të shprehej ministri Zhiti.
Takimi
Të pranishëm në takimin e djeshëm përkujtimor ishin: ministri i Kulturës, Visar Zhiti, ish-ministri Bujar Leskaj, Ylljet Aliçka, shkrimtari Lazër Stani, dhe miku i hershëm i Koliqit, Mërgim Korça. Në fjalën e tij, ministri Zhiti vlerësoi lart personalitetin krijues dhe kulturor të Ernest Koliqit, që la gjurmë të thella në kulturën kombëtare. “Fenomeni ‘Koliqi’ i tejkalon vdekjet e veta, atë që është e natyrshme për jetë njerëzish dhe veprash, por dhe ato që ia dhanë plot me mëri, vdekjet si dënim dhe hakmarrje parake. Sipas sentencës latine, mund të themi se vepra koliqjane tashmë i është vënë udhës së ringjalljes e jo vetëm të vetvetes”, – tha ai. Sipas Zhitit, duhet theksuar rëndësia e jashtëzakonshme e veprës së Koliqit dhe cilësia e saj e veçantë gjithashtu. “Koliqi është shkrimtar i klasit të parë, që bashkë me Mitrush Kutelin, janë themelues të tregimit modern në letërsinë shqipe”, – vlerësoi ai.
E ndërsa fliste për kohën kur Koliqi ka qenë ministër i Arsimit në qeverinë shqiptarë nën pushtimin italian, Zhiti u shpreh: “Si ministër Arsimi, ai punoi për përhapjen e mësimit shqip në Kosovë. Në kohën kur në Shqipëri komunistët shqiptarë bashkëpunonin me jugosllavët për të themeluar Partinë Komuniste që do ta izolonte Shqipërinë për pesë dekada, Koliqi ngriti shkolla të mesme në Kosovë. Ato vite që shënuan bashkimin e Shqipërisë me Kosovën, po themelohej partia që do ta harronte pjesën tjetër të Shqipërisë”. Sipas Zhitit, Koliqi arriti të parashikonte edhe rënin e regjimit me veprat e tij. Mërgim Korça, mik i Koliqit i pranishëm në takim, tha para të pranishmëve se e ka dashur shumë shkrimtarin, edhe pse për herë të fundit e ka takuar kur qe vetëm 12 vjeç. “Ndër kolaboracionistët, ai është sharë më shumë, është lënë në harresë më shumë, është nëpërkëmbur më shumë, por padyshim, ai kishte më të drejtë se të gjithë. Ai ishte shumë largpamës, e ata që i dilnin kundër, pa vizion, ai ishte më largpamës se miqtë e tij që dolën të bëjnë Luftën Nacionalçlirimtare”, – tha Korça. Ai theksoi se ka qenë fat i madh që Koliqi ka qenë ministër Arsimi.
Edhe Lazër Stani, në fjalën e tij i qëndroi idesë se postin e ministrit të Arsimit, Koliqi e përdori për përhapjen e fjalës shqipe.
Vepra në letërsi
Sa i takon letërsisë së tij, ministri Zhiti tha se me nismën e Koliqit janë botuar antologjitë e para të letërsisë shqipe, të folklorit shqiptar, është nismëtar i ngritjes së bibliotekave në qytetet e ndryshme të Shqipërisë, ka kontribut të jashtëzakonshëm në shtypin kulturor si publicist dhe mendimtar. Ai nënvizoi se Ernest Koliqi, me vizionin e tij është shkrimtari i parë që parashikoi vdekjen e komunizmit dhe shembjen e regjimit totalitar nëpërmjet dramës së tij të njohur “Rrajët Lëvizin”. Në përfundim të fjalës së tij, Zhiti tha se “kultura shqiptare, e çliruar më shumë tashmë nga paragjykimet dhe sundimi i tepërt ideologjik, po kupton gjithnjë e më mirë të kaluarën dhe vlerat e trashëguara, si një pasuri e përbashkët që i duhen kthyer asaj që i përkasin, së ardhmes. Askush nuk ka të drejtë të dënojë të tashmen me gjymtimin e kulturës”.

21.05.2013

Burimi: Balkanweb

The post Ernest Koliqi Ministria e Kulturës: Kolaboracionisti më i mirë (Burimi: Balkanweb, www.balkanweb.com) appeared first on Lajm-shqip.

Historia e nënës me 3 jetimë, shërbimi social: I takon ndihma ekonomike (Burimi: Balkanweb, www.balkanweb.com)

lajmi sot — Tue, 21 May 2013 18:03:06 +0000

TIRANË- Pas kronikës së transmetuar në News 24 ku tregohej historia tronditëse e nënës së re me 3 fëmijë jetimë që jetonin në një bodrum të lagësht pa asnjë të ardhur, ka reaguar Shërbimi Social Shtetëror.

Drejtues të këtij institucioni thanë se do të ndërhyhet pranë minibashkisë 11 që familja të marrë ndihmë ekonomike në njësinë ku jeton si dhe do të kërkohet strehimi i fëmijëve më të rritur në qendrat rezidenciale për jetimët.

“Për familjen në fjalë për të cilën u dha edhe një kronikë në News 24 diskutuam edhe me stafin e Shërbimit Social Shtetëror dhe mundësitë që kemi tani për tani janë që kjo familje të trajtohet me skemën e ndihmës ekonomike në njësinë vendore ku ajo bën pjesë”, thotë Drejtori i Kontrollit të Ndihmës Ekonomike Leonard Strazimiri.

Sipas Shërbimit Social Shtetëror 3 fëmijët e mbetur jetim pas vdekjes së të atit nuk e gëzojnë dot statusin e jetimit pasi jetojnë me nënën e cila nga ana e saj nuk pranon të heqë dorë nga kujdestaria.

Në një situatë të tillë, Drejtori i Kontrollit të Ndihmës Ekonomike Leonard Strazimiri thotë se zgjidhja më e mirë do të ishte strehimi provizor i 2 fëmijëve më të rritur në qendra rezidenciale për fëmijët jetimë.

Në mungesë të bashkëshortit i cili ka rreth 20 ditë që ka ndërruar jetë pas një ataku në zemër, nëna e 3 fëmijëve Yze Berberi iu drejtua me një apel qytetarëve dhe biznesmenëve të ndryshëm për ndihmë përmes Gazetës Shqiptare dhe News 24.

“Shteti merr përsipër që për fëmijët që kanë moshën të trajtohen dhe rehabilitohen në institucionet tona publike, për t’ju ardhur në ndihmë kësaj familje deri në momentin që nëna të jetë e aftë për tu kujdesur për ta dhe për t’i bërë ballë jetesës.

Historia e gruas bëhet edhe më e trishtë kur mësohet se edhe vetë ajo ka lindur dhe është rritur jetime dhe e vetmja ditë e bardhë në jetën e saj ka qenë martesa me bashkëshortin Luanin, një tjetër jetim.

Aktualisht nëna po kalon një traumë të rënde depresive duke kërcënuar se do t’i japë fund jetës pasi nuk arrin dot t’i shikojë fëmijët e saj tek vuajnë për bukën e gojës.

Yze Berberi lë këtë numër kontakti për këdo që mund ta ndihmojë.
066 65 21 404

21.05.2013

Burimi: Balkanweb

The post Historia e nënës me 3 jetimë, shërbimi social: I takon ndihma ekonomike (Burimi: Balkanweb, www.balkanweb.com) appeared first on Lajm-shqip.

Spaç 21-23 Maj 1973, 40 vjetori i ngritjes së flamurit pa yll (Burimi: Bedri Blloshmi)

lajmi sot — Tue, 21 May 2013 17:32:02 +0000

Për herë të parë në historinë e komunizmit barbar në Spaç të Rrëshenit u ngrit një flamur pa yllin e komunizmit.Mbas pushtimit të Shqipërisë nga terroristët komuniste të stërvitur nga Popoviçët e Mugoshët në 1944,këta barbar ja filluan krimeve mbarë duke ngritur burgje gjithkund në Shqipëri.Mbasi e rrethuan me tela dhe me gjëmba 28000 km² e mbetura të Shqipërisë së copëtuar në vitin 1913,gjithëkund hapën burgje dhe kampe përqëndrimi .Një nga këto kampe shfarosës ishte dhe burgu i Spaçit.Arrestoheshin në masë familjet nacionaliste, u grabiteshe pasuria mbasi i varnin, pushkatonin dhe i burgosnin ata që mbeteshin gjallë,pjesa tjetër e çdo familje syrgjynosej në kampet e internimit .Më 21 Maj 1973 në Spaç të Mirditës, dhuna kishte kaluar çdo kufij ndaj të burgosurve politik dhe ndodhej ajo që pritej .Të gjithë të burgosurit e turnit të parë vendosën të mos dalin në punë dhe dolën në mbrojtje të Pal Zefit ,i cili mbasi e kishte mbushur muajin në izolim (birucë)dhe policia nuk po e nxirrte nga izolimi.Të gjithë të burgosurit ishin në një mëndje, ishin bërë tepër të revoltuar për ta mposhtur diktaturën komuniste.Biseduan, vendosën dhe ngritën flamurin me zhgabën dy krenare pa yllin komunistë “qëndisur nga dora e një të burgosuri Mersin Vlashi”.Kampi famkeq mbasi ishte rrethuar nga ushtria e civilë të armatosur, u prenë ujin e pijshëm dhe bukën duke mos pranuar thirrjen e zv.ministrit të brëndshëm Feçorr Shehut.Të burgosurit rezistuan duke i bërë nderim për tre ditë rrjesht flamurit shqiptar.Më në fund bijt e Stalinit u vërsulën si Hienat me hunjë e tuba gome dhe me çtë mundnin duke i dërrmuar e thyer këmb e duar,i prangosnin dhe i nxirrnin sipër për ti gjykuar. Ishte 12 dhjetshja e parë,ku nga këta 4 ishin të burgosur politik: Skënder Daja , Dervish Bejko , Pal Zefi dhe Hajri Pashaj. Duhej tu merrej jeta dhe ashtu bënë.Edhe sot e kësaj dite askush nuk e di ku jane groposur,pra ata heronje trima që dhanë jetën para 40 vjetëve.Nga shteti shqiptar askush nuk do të dijë apo të interesohet ti gjejn dhe tu bëjn një varr.Në spaç vazhduan grupe-grupe të dënoheshin me rastin e revoltës.Janë 5-6 grupe të cilët e kalojnë numrin 80 që janë ridënuar.Njëmbëdhjetë vjet me vonë po në muajin Maj ,gati në një datë dhe fiks më 22 Maj 1984 në një tjetër skëterrë të komunizmit në Qaf-Bari të Pukës dhuna solli dhunë.Komunistat të cilët jetonin vetëm me gjak njeriu dhe këtu në këtë kamp caktuan tre kurbanë. Vetëm se me një ndryshim se komunizmi dhe sigurimi i kishin perfeksionuar,kishin çuar përpara dy të dënuar me vdekje dhe të tretin e sakatuan me dru duke e thyer në mes. Sokol Sokoli dhe Tom Ndoja do dënoheshin me pushkatim në birucat e degës së brendshme të Pukës për ti pushkatuar më pas në qytetin e Shkodrës ,në vendin e quajtur “antena e radios” në Kuç. Të gjithë e dimë tani se Sokol Sokoli dhe Tom Ndoja me këmbënguljen time ,jo më pak dhe të familjarëve u gjetën dhe u vendosën atje ku u takonte, madje kane secili varrin e vet e jo më gropën e përbashkët si më parë në livadhin e antenës në kuç të Shkodrës. Edhe me këtë rast qeveritarët e sotëm nuk u ndjenë fare për varrimin e këtyre trimave të persekutuar përballë dikaturës.Ndërsa Sandër Sokoli i cili dha shpirt në sheshin para mencës midis dhimbjeve dhe gjakut që i rridhte në çimenton e zezë të oborrit ,është groposur tek varrezat 500-600m larg kampit në buzë të një përroi bashkë me 8 të vrarët në galeritë e territ të Qaf-Barit.Për të mësuar më shumë për revoltën e Qaf-Barit dhe për ata që dhanë jetën, si ndodhi dhe si përfundoi duhet të prisni se së shpejti del libri që unë kam pergatitur të ilustruar me fakte dhe faksimile. Ndryshe është problemi i Spaçit ,sado që familjarët të interesohen për të gjetur njerëzit e tyre te vrarë barbarisht e te groposur mizorisht,nuk mund të bëjnë asgjë pa ndihmën e shtetit. Shteti i cili është formuar nga bijtë e komunisteve dhe nga oficerë që në vitin 1991 morën mbi shpinë bustin e diktatorit për ta vendosur përsëri.Kërcënonin se do bënin kërdinë duke vrarë ata që do mundoheshin ti pengonin. Shteti i sotëm është i fryrë me komuniste e neokomunistë të cilët grabisin pasuri kombëtare e vazhdojnë të pasurohen me shpejtësi marramëndëse.Shteti i sotëm ka përkrahur dhe vazhdon të përkrahë sigurimin kryetar të shoqatave të Enverit, llumra te mbledhur per skrap,famkeq,hetues,operativ dhe kryetarë degësh të punëve të brëndshme,spiuna e bashkëpunëtorë informator të fëlliqur.Pushteti i sotëm krejt i përbërë me komunista e sigurimsa madje dhe me vrasësa siç është rasti i Librazhdit,spiun po,hajdut po,vrasës po, caktohet kryetar partie zv.prefekt.Ja kjo është partia demokratike që të pranon nëse ke këto kritere.Prokuroria e Librazhdit me pak ryshfet mbyll çdo lloj krimi po e pate kryer e nëse bënë pjesë në partinë demokratike.Të gjithë prokurorët e përgjithshëm e dinë këtë problem të Librazhdit por askush nuk ka kurajon të hapi ngjarje të vjetra.Kur vine ne atë karrike premtojne se do luftojne krimin,se toleranca do jete zero dhe të japin pershtypjen se do zbatojne ligjin e tajlonit (zjarrit ti pergjigjem me zjarre) ndërsa ne realitet bejne te kunderten.Vine shohin,pasurohen dhe ikin pa u ndjerë.

Pushofshi në paqe ju të rënët e burgut në Spaç dhe Qaf-Bari.Dhe mos t’ju ngelet merak,se sjeni gjallë se po të ishit gjallë e të shihnit sot ku jemi ne ju do kishit vrarë vehten.Pushofshi ne paqe ju të tjrë që ratë për nje shqipëri etnike dhe pa komunista,ne do ju kujtojme gjithmon.Mos kini merak o heronjtë e Spacit se unë nuk do te rresht së kërkuari dhe do tu gjej se ku u ka groposur komunizmi.

Nga Bedri Blloshmi

The post Spaç 21-23 Maj 1973, 40 vjetori i ngritjes së flamurit pa yll (Burimi: Bedri Blloshmi) appeared first on Lajm-shqip.

Brazili dhe nafta: Një superfuqi në ndërtim e sipër (Burimi: Gazeta Shqip, www.gazeta-shqip.com)

lajmi sot — Tue, 21 May 2013 17:12:44 +0000

Brazili-Pas pesë vitesh jo të mira, sektori i koncesioneve të naftës dhe gazit në Brazil po lulëzon sërish. Më 14 maj, autoriteti kombëtar ANP dha me sukses në ankand 142 blloqe në 11 fusha naftëmbajtëse, qoftë në tokë ashtu edhe në det, zona që besohet se mund të kenë deri në 35 miliardë fuçi naftë.

Por blloqet në basenin verilindor Parnaiba dhe ato që gjenden pranë zbulimeve të gazit të kohës së fundit në grykëderdhjen e lumit Amazon, tërhoqën garë të ashpër. Në total, 12 kompani vendëse dhe 18 të huaja paguan 2.8 miliardë reais, (1.4 miliardë dollarë) për të drejtat e eksplorimit, duke thyer një rekord të shënuar në vitin 2007 kur një ankand i ngjashëm arkëtoi 2.1 miliardë reais.

“Petrobras”, gjiganti i naftës i kontrolluar nga shteti, fitoi disa blloqe vetëm dhe disa blloqe të tjera të partneritet me “BP” nga Britania dhe “Total” nga Franca, duke përfshirë një bllok të rëndësishëm për të cilin konsorciumi pagoi 346 milionë reais, një rekord tjetër. OGX, një kompani braziliane e themeluar nga Eike Batista, një tajkun minierash dhe energjie, konkurroi gjithashtu rëndë. Apo pagoi 377 milionë reais për 13 blloqe, përfshirë edhe shumë blloqe në basenin Parnaiba, ku kompania sakaq po prodhon gaz.

OGX ishte e dëshpëruar për perspektiva të reja: Ajo ka humbur 90 për qind të vlerës së vet tregtare pasi u detyrua të pranojë vitin e kaluar se zonat e saj naftëmbajtëse në brigjet e Rio de Zhaneiros qenë më pak produktive nga sa ishte shpresuar.

MPX, një kompani tjetër e Batistës, do të përfitojë nga zhvillimi pasi po ndërton një kompleks të madh centrali elektrik me gaz pranë fushave të Parnaibës.

“Petromanas”, kompania shtetërore malajziane e naftës, mori pjesë në garë por nuk fitoi asgjë.

Kur “Petrobras” zbuloi një burim të stërmadh pré-sal ose “poshtë kripës” ku mund të gjenden ndoshta 100 miliardë fuçi naftë pranë brigjeve të Rio de Zhaneiros më 2007-n, Brazili dukej sikur do të bëhej kufiri më joshës i naftës në botë. Por zbulimi shkaktoi edhe “nacionalizmin e burimeve”. Qeveria ndaloi ankandet, ndërsa rishkroi rregullat e koncesioneve. Ligjet miqësore me tregun që i lejonte të gjitha firmat (publike, private apo të huaja) të konkurronin në kushte të barabarta, u zëvendësuan me një ligj që e bëri “Petrobras” operatorin e vetëm të fushatës pré-sal megjithëse kompanitë e tjera mund të marrin paketa aksionesh financiare.

Bllokimi vijues u shkaktua nga politikanët që po grindeshin mbi mënyrën se si duhej të ndahej renta minerare, (taksat mbi xhiron e krijuar nga shfrytëzimi i burimeve natyrore). Shtetet që nuk kishin naftë apo gaz kërkonin gjithsesi të merrnin një pjesë. Rio de Zhaneiro kërcënoi se do të rikuperojë paratë që do t’i merreshin për të paguar shtetet që nuk kanë naftë, duke rritur ndjeshëm koston e licencave mjedisore për kompanitë që veprojnë në zonën e saj. Qeveria federale donte të zgjidhte këto probleme para se të rifillonte ankandet. Por më herët këtë vit, grindja përfundoi në Gjykatën Supreme dhe qeveria e humbi durimin.

Këtë rast nuk pati blloqe nën kripë në ofertë për ankand. Por qeveria shpreson të shesë disa paketa prej tyre nga fundi i këtij viti si dhe disa zona argjilore premtuese. Pasi shiti bonde me vlerë 11 miliardë dollarë më 13 maj, “Petrobras” duket e gatshme të përballet me sfidën e të qenët operator i vetëm.

Për të zhvilluar depozitat, të cilat janë në ujëra shumë-shumë të thella dhe të groposura nën shkëmbinj me një shtresë të trashë kripe, do të nevojiten oqeane të tëra me para. Vendimi i qeverisë për të mbajtur çmimet e naftës të ulëta për të luftuar inflacionin dhe për të detyruar “Petrobras” të favorizojë furnizuesit vendorë, e ka vënë kompaninë nën vështirësi ekstra.

Pjesëmarrja e fortë në ankandet e kësaj jave ka hequr frikën se kompanitë e huaja mund të humbasin interesin për Brazilin.

Por ndërsa Brazili u mor me diskutimet se kush do të shfrytëzojë naftën poshtë kripës dhe se si duhet të ndahen fitimet, nafta dhe gazi në zonat argjilore në SHBA e kanë zëvendësuar burimin poshtë kripës si lajmi më interesant i botës sa i përket energjisë.

“Rio mund të ishte bërë zonja e industrisë së naftës tani”, thotë Adriano Pires, një konsulent energjie në Rio. “Ne humbën një mundësi të artë për të tërhequr investime dhe për të krijuar vende pune”. Sipas vlerësimeve të tij, Brazili ka humbur rreth 20 miliardë reais në pagesa të paarkëtuara për të drejta eksplorimi si pasojë e bllokimit politik.

21.05.2013

Burimi: Gazeta Shqip

The post Brazili dhe nafta: Një superfuqi në ndërtim e sipër (Burimi: Gazeta Shqip, www.gazeta-shqip.com) appeared first on Lajm-shqip.

Parashikim Ndeshje Sportive 21 Maj 2013

Lajme Sportive — Tue, 21 May 2013 16:06:30 +0000

Parashikim

Oldenburg – Ulm shenohen mbi 158.5 pike koef. 1.56

Keto 2 ekipe jane 2 ekipet qe shenojne me shume ne kampionat,te renditur pas Phoenix Hagen dhe Brose Baskets. Mjafton te hedhim nje shikim ne ndeshjet e tyre te fundit

Oldenburg vs. Bonn 89-90, 88-82, 97-67, 88-80.

Ulm vs. Artland 94-74. 85-90, 83-68, 95-84.

Dhe mbi te gjitha, ndeshjet direkte mes ketyre ekipe: 91-95, 96-66, 84-80, 86-66, 101-83.

Fakte mese te mjaftueshme qe kjo ndeshje eshte over 158.5.

1.	Brose Baskets	34	26	8	2915:2536	52
2.	Oldenburg	34	25	9	2670:2432	50
3.	Ulm	34	24	10	2888:2642	48
4.	Bayern	34	21	13	2823:2555	42
5.	Alba Berlin	34	20	14	2689:2558	40
6.	Artland	34	20	14	2635:2614	40
7.	Bonn	34	18	16	2779:2766	36
8.	Phoenix Hagen	34	18	16	2955:3057	36
9.	Wurzburg	34	17	17	2430:2395	34
10.	Tübingen	34	16	18	2654:2728	32
11.	Bremerhaven	34	15	19	2697:2732	30
12.	Trier	34	15	19	2567:2584	30
13.	Braunschweig	34	14	20	2560:2628	28
14.	Frankfurt	34	14	20	2433:2426	28
15.	Bayreuth	34	14	20	2530:2642	28
16.	Mitteldeutscher	34	13	21	2530:2651	26
17.	Ludwigsburg	34	12	22	2546:2663	24
18.	Giessen	34	4	30	2339:3031	2

The post Parashikim Ndeshje Sportive 21 Maj 2013 appeared first on Lajm-shqip.

Vidhet makina e këngëtarit Sherif Merdani: E kisha blerë me lekët e burgut (Burimi: Balkanweb, www.balkanweb.com)

lajmi sot — Tue, 21 May 2013 16:04:06 +0000

TIRANË- Vidhet makina e makina e këngëtarit të njohur Sherif Merdani. Lajmi konfirmohet nga vetë këngëtari për News24, i cili denoncoi vjedhjen e makinës së tij tip ‘Citroen Pikaso’ me ngjyrë të zezë me targë, TR2824U, me vlerë prej 20 mijë eurosh. Këngëtari ka bërë kallëzimin në Komisariatin Numër 2.

Këngëtari i prekur, në një prononcim për New24, i bëri thirrje hajdutëve që ti kthejnë makinën të cilën e ka blerë me shpërblimin e viteve të burgut të kryer gjatë diktaturës.

“Makina ndodhej në zonën “Dëshmorët e Lirisë”, ku unë banoj unë. Një ditë para vjedhjes i kanë thyer xhamin e parë, sepse djali kishte harruar çelësat rezervë brenda në makinë. Këtë gjë e dinim vetëm unë dhe djali dhe punëtorët e lavazhit. Unë xhamin e përmirësova e lidha dhe të nesërmen ika me gruan në kishën e Shën Ndoit (Laç) dhe pas ceremonisë e parkuam makinën ne territorin e shtëpisë dhe në mëngjes nuk e gjetëm më. Kjo ndodhi natën e së shtunës, (më18.05.2013). Menjëherë vajta në Komisariatin numër 2, që më morën informacionin. Deri tani ka vetëm dyshimi. Dua të bëj një thirrje, atyre që e kanë marrë. Duhet të dinë se Sherif Merdani i ka shlyer Zotit të gjitha dhe Zoti ia fali jetën. Kam punuar 11 vjet në minierë dhe shteti më dha 20 mijë euro shpërblim për vitet e burgut, më kanë vjedhur rininë time. Diktatura po vazhdon të më vrasë. Ju bëj thirrje të më sjellin makinën dhe të më kërkojnë të falur janë të falur nga unë”, deklaroi Merdani i prekur për News24.

Vjedhja është kryer më datë 18.05.2013, ndërkohë që po punohet për identifikimin dhe kapjen e autorëve.

21.05.2013

Burimi: Balkanweb

The post Vidhet makina e këngëtarit Sherif Merdani: E kisha blerë me lekët e burgut (Burimi: Balkanweb, www.balkanweb.com) appeared first on Lajm-shqip.

Shfuqizimi i shefave të QSUT, Pipero çon në gjyq ministrinë (Burimi: Balkanweb, www.balkanweb.com)

lajmi sot — Tue, 21 May 2013 15:49:46 +0000

TIRANE- Shfuqizimi i emërimit të shefave të shërbimit në Qendrën Spitalore Universitare “Nënë Tereza” nga ministri i Shëndetësisë, Halim Kosova ka përfunduar në gjykatë. Ish-drejtori i Politikave Shëndetësore në MSH, Pëllumb Pipero, në cilësinë e shefit të shërbimit të Infektivit, ka paditur Ministrinë e Shëndetësisë dhe QSUT-në për urdhrin e muajit prill.

Përmes padisë, Pipero kërkon shpalljen e tij të pavlefshëm, duke kthyer në këtë mënyrë strukturën e re në fuqi. Ndërkohë që, në një prononcim për “Gazeta Shqiptare”, Pipero shpjegoi se ky veprim nuk është personal, por për funksionin e shefit të shërbimit. “Nuk e di nëse shefat e tjerë të shërbimit kanë ngritur padi, por unë personalisht e ndërmora një hap të tillë. Çështja është se unë nuk e kam bërë për Pëllumbin si individ, por për funksionin që mbart në vetvete shefi i shërbimit. Mendoj se politika nuk duhet të ndërhyjë deri te ky lloj pozicioni. Kjo lloj ndërhyrje është një ‘vrasje’ për sistemin shëndetësor në vetvete”, – u shpreh Pipero. Ndërkohë që, sa i takon vendimit që mund të marrë gjykata, ai tha se jo çdo vendim i tillë ka gjetur zbatim nga administrata shtetërore. “Nuk dua të komentoj vendimin që mund të marrë gjykata, sepse ajo është e lirë të vendosë sipas legjislacionit në fuqi. Megjithatë, shumë vendime të gjykatave në vendin tonë nuk gjejnë zbatim nga administrata shtetërore”, – tha Pipero.

Ngjarja
Në nëntor të vitit të kaluar Këshilli i Ministrave miratoi vendimin “Për miratimin e kritereve, për përcaktimin e numrit të personelit dhe kapaciteteve të njësisë së shërbimit në qendrat spitalore universitare”, sipas të cilit numri i shefave të shërbimeve në QSUT reduktohej nga 64 në 26. Pas këtij vendimi, u mblodh një komision ‘ad-hoc’, i cili përcaktonte strukturën e re që do të kishte QSUT e që në thelb kishte bashkimin e disa shërbimeve spitalore në një të vetëm. Gjithashtu, u bë edhe përzgjedhja e shefave të rinj sipas strukturës së re, ndërsa pjesës më të madhe të tyre iu zbardh edhe vendimi për të nisur punë. Ndërkohë që emërimi i disa shefave të tjerë u shoqërua me pakënaqësi dhe ankesa. Pas rreth 2 muajsh të mbledhjes së komisionit dhe emërimit të shefave të rinj, ministri aktual i Shëndetësisë, Halim Kosova, nxori një urdhër për shfuqizimin e emërimit të tyre, gjë që solli dhe pakënaqësi te “të sapoemëruarit”. Për këtë arsye, 11 prej tyre nënshkruan një letër drejtuar kryeministrit Berisha, përmes së cilës i shpjegonin arsyet se përse urdhri i Kosovës ishte i paligjshëm. Sipas tyre, ministri nuk mund të shfuqizojë një vendim të marrë nga bordi i Qendrës Spitalore Universitare “Nënë Tereza”. Po ashtu, ata argumentonin se urdhri hedh poshtë VKM-në e datës 07.11.2012, i cili nënkupton reduktimin e numrit të shefave të shërbimit.

21.05.2013

Burimi: Balkanweb

The post Shfuqizimi i shefave të QSUT, Pipero çon në gjyq ministrinë (Burimi: Balkanweb, www.balkanweb.com) appeared first on Lajm-shqip.

Zhvlerësimi i lekut, ekspertët: Ndikon situata politike (Burimi: Balkanweb, www.balkanweb.com)

lajmi sot — Tue, 21 May 2013 15:24:52 +0000

TIRANË- Situata politike në vend, në këtë prag zgjedhjesh ka ndikuar në zhvlerësimin e monedhës vendase (Lekut), kundrejt valutave. Eksperti i ekonomisë Adrian Civici shpjegon se te qytetarët është krijuar pasiguri, gjë që reflektohet te prirja e tyre për të kursyer, c’ka ndikon edhe te pozitat e valutave në treg.

“Edhe ndikimi i situatës parazgjedhore, por dhe pas zgjedhore do të ndikojë se në fund të fundit, kjo klimë kaq e tensionuar politike reflektohet edhe në sjelljen e konsumatorëve, qoftë në tendencën për kursim dhe në ruajtjen e monedhës së fortë, qoftë për një lloj frenimi të konsumit dhe veprime të tjera që bëjnë. Nga ana tjetër edhe një lloj tkurrjeje do thoja edhe e investimeve të huaja direkte që vjen nga paqartësitë ose nga ndryshimet e mëdha që ka në programet e paraqitura nga dy koalicionet e mëdha politike, dhe natyrisht nga investime masive dhe rifinancime të ekonomisë shqiptare, priten situata ku të jetë edhe më i qartë sistemi i taksave”, sqaroi Adrian Civici, presidenti i UET.

Sipas kursit të Bankës së Shqipërisë, euro ka arritur kuotën e 141.1 lekëve, ndërsa dollari shkëmbehet me 109.6 lekë. Përvec zgjedhjeve, Civici rendit edhe dy faktorë të tjerë që aktualisht po përcaktojnë luhatjet e monedhave në vendin tonë.

“Reflektohet ndikimi ndërkombëtar, dollari është forcuar, gjithashtu edhe euro mbetet një monedhë e fortë. Së dyti është edhe ndikimi i mosdaljes së prodhimit vendas në mënyrë masive. Akoma nuk ka filluar sezoni turistik që direkt ose indirekt sjell shumë të ardhura, sidomos euro në tregun shqiptar dhe së treti mendoj se është një ndryshim ose një efekt më strukturor do të thoja, ekonomia shqiptare, në fund të fundit Leku pasqyron edhe shëndetin e një ekonomie”, theksoi Civici.

Sipas Adrian Civicit, fakti që Leku po dobësohet gradualisht gjatë dy-tre viteve te fundit tregon për ndryshimet strukturore që i nevojiten ekonomisë shqiptare dhe zbatimin e një modeli të ri ekonomik.

21.05.2013

Burimi: Balkanweb

The post Zhvlerësimi i lekut, ekspertët: Ndikon situata politike (Burimi: Balkanweb, www.balkanweb.com) appeared first on Lajm-shqip.

Arvizu takime në PS: Jemi të shqetësuar për KQZ. (Burimi: Balkanweb, www.balkanweb.com)

gazeta shqip — Tue, 21 May 2013 14:44:35 +0000

Arvizu Ambasadori amerikan në vendin tonë, Aleksandër Arvizu zhvilloi sot një takim me liderin e socialistëve, Edi Rama.

Pas takimit, për mediat Arvizu tha se SHBA janë të shqetësuara për mënyrën si po funksionon Komisioni Qendror i Zgjedhjeve. Ambasadori theksoi se palët janë ende larg arritjes së një marrëveshjeje.
“Ajo që është shqetësim për Shqipërinë është mosfunksionimi i KQZ, që nuk po funksionon si duhet”.

Arvizu bëri të ditur se për këtë cështje ka folur me PS dhe me parti të tjera, ndërsa apeloi që politika duhet të bashkëpunojë për zgjidhjen e kësaj cështje.
“Palët duhet të punojnë së bashku për të plotësuar KQZ. Kemi folur me PS do e bëjmë dhe më parti të tjera këtë gjë. Jo me z Berisha nuk kemi folur, por kemi qenë në kontakt me Partinë Demokratike”, theksoi Arvizu.

Gjiknuri
Pasi percolli ambasadorin jashte selise roze, Sekretari per Ceshtjet Zgjedhore ne PS, deputeti Damian Gjiknuri theksoi se PS eshte e gatshme dhe e hapur per te kthyer KQZ-ne ne normalitet.

“PS ka pasur qëndrim konstant, jemi të hapur për cdo zgjidhje, në parlament, mënyra e zgjidhjes mbetet në negociatë, deri kemi dëgjuar tranzigjencë nga shkelësi i ligjit që është Berisha. Ne jemi të përgatitur të shkojmë ne zgjedhje dhe me KQZ”- ka thene ai.

Sipas Gjiknurit, deri tani nuk ka asnjë sinjal konkret. “Mundësitë janë qe KQZ të kthehet në parlament se aty është vendi ku u cenua legjitimiteti i saj”- tha ai.

21.05.2013

Burimi: Balkanweb

The post Arvizu takime në PS: Jemi të shqetësuar për KQZ. (Burimi: Balkanweb, www.balkanweb.com) appeared first on Lajm-shqip.