Postuar me: 9:43 12-06-2012

Pacolli: Jahjaga të lërë presidencën

Shperndaje
Etiketat

Behgjet Pacolli konsideron se është i pamoralshëm dhe qesharak qëndrimi i mëtejshëm i Atifete Jahjagës në Presidencë. Zëvendëskryeministri i qeverisë “Thaçi” thotë se marrëveshja është e qartë dhe presidentja aktuale duhet të lëshojë rrugë. Pacolli fton Hashim Thaçin, Isa Mustafën dhe ambasadorin Christopher Dell që t’i përmbahen marrëveshjes pikë për pikë.

Ish-Presidenti i Republikës së Kosovës, Behgjet Pacolli nuk pajtohet që gruaja e cila ia “rrëmbeu” postin e të parit të shtetit, Atifete Jahjaga, të qëndrojë në këtë pozitë më tepër se një vit.

Në një intervistë të dhënë të hënën për Express, Pacolli e ka quajtur qesharake dhe të pamoralshme tendencën për të prishur marrëveshjen e arritur me liderin e PDK-së, Hashim Thaçi, dhe atë të LDK-së, Isa Mustafa, për mbajtjen e zgjedhjeve të para presidenciale.

“Çdo figurë politike që është paraqitur para qytetarëve për votë, ka përgjegjësi për të respektuar marrëveshjet dhe premtimet. Rasti me Presidenten, jo që është premtim, por është një marrëveshje e shkruar, e miratuar edhe në Kuvend përmes një rezolute, përndryshe para qytetarëve do të dalim qesharakë dhe do të humbim besimin”, ka thënë Pacolli.

Ai ka kërkuar përgjegjësi për respektimin e marrëveshjes, si nga presidentja Atifete Jahjaga, ashtu edhe nga ambasadori Christopher Dell, si palë ndërmjetësuese në tërë procesin.

“Kjo marrëveshje e legjitimuar nga Kuvendi posedon edhe një palë tjetër, që është ambasadori amerikan, Dell, i cili nga atëherë ka marrë përgjegjësinë që marrëveshja do të implementohet pikë për pikë. Çdo vonesë ose tentim vonese që të veprohet ndryshe në ketë drejtim, është e pamoralshme”, ka thënë zëvendëskryeministri Pacolli.

12.06.2012

 

Burimi: Gazeta Shekulli

Rreth Autorit

Komenti Juaj :

CAPTCHA *

All Rights Reserved 2016.